ჩანაფიქრი ასეთი იყო: ეკეთებინათ საქმე, სადაც თავიანთი მისწრაფებების, გამოცდილებისა და უნარების მრავალმხრივი გამოყენების საშუალება ექნებოდათ. ნინო სხირტლაძისა და ლიზი ხაბაზაშვილისთვის თვითგამოხატვის ამ ინსტრუმენტად „კონსიერჟ თბილისი“ იქცა. სტუმრის მაღალ დონეზე დახვედრა, მათთვის სასურველი მომსახურების შეთავაზება და დაუვიწყარი შთაბეჭდილებების შექმნა კონსიერჟებისთვის ერთგვარი გამოწვევაა, რომელსაც თავს წარმატებით ართმევენ.

„კონსიერჟ თბილისის“ მომსახურების ფართო სპექტრს თანამედროვე სამყაროში ქეითერინგის აუცილებლობა განსაზღვრავს. ამის გარეშე დღეს თითქმის არცერთი ღონისძიება, ვიზიტი თუ უბრალო შეკრებაც არ ტარდება. „კონსიერჟ თბილისის“ დამკვეთებს, მათი გასტრონომიული გემოვნების, ტრადიციებისა თუ, უბრალოდ, სურვილის გათვალისწინებით, ნინო სხირტლაძე განსხვავებულ მენიუს უდგენს. მისი საავტორო მენიუს შეფუთვაზე, წარდგენასა და დეკორაციაზე კი კომპანიის დამფუძნებელი ლიზი ხაბაზაშვილი ზრუნავს.

ნინო კერძებს თავადაც ხშირად  ამზადებს, კულინარიული ექსპერიმენტები და საავტორო ვერსიების ძიება უყვარს. სპეციალურად „კულინარტისთვისაც“ მან ორი კერძი საკუთარი კრეატიული რეცეპტურიდან შეარჩია.   

    

 ნინო სხირტლაძე, „კონსიერჟ თბილისის“ გენერალური დირექტორი:

„კულინარია ჩემი ერთ-ერთი მთავარი გატაცებაა, ასევე, განტვირთვისა და თვითრეალიზაციის საუკეთესო საშუალება. მიყვარს ოჯახისა და მეგობრებისთვის განსხვავებული კერძების მომზადება, ხშირად მეხუმრებიან ხოლმე, ახლა რომელ ქვეყანაში გვამოგზაურებო. კულინარიაში ყოველთვის შემიძლია ვიყო კრეატიული, შევცვალო რეცეპტები და ჩემებური ხედვით მოვამზადო ესა თუ ის კერძი. ხშირად ვიმახსოვრებ რა ინგრედიენტები იყო კერძში, შემდეგ ვიკვლევ სხვადასხვა რეცეპტს და ჩემეულ ვერსიას ვქმნი. დღესაც სწორედ ასე მოგიმზადეთ ორივე კერძი. ეს უცნაური სალათი, მახსოვს, მალიორკაზე დავაგემოვნე, ხოლო საქონლის ხორცი მონღოლურად ჩემი მეგობრებისგან ვისწავლე და ჩემებურად დავამუშავე ინტერნეტ რეცეპტების დახმარებით.

– რომელ სამზარეულოს ანიჭებთ უპირატესობას? როგორი გემოები მოგწონთ და თავად რას ამზადებთ ყველაზე ხშირად?

ჯერ კიდევ კვლევისა და ახალი გემოების შესწავლის სტადიაზე ვარ, მაგრამ მგონია, რომ აზიური სამზარეულოს მრავალფეროვნება ჩემზე დიდ ზეგავლენას ახდენს. ჯანსაღი კვების კუთხით, რა თქმა უნდა, იაპონური სამზარეულო პირველია, თუმცა გემოებით თამამი ექსპერიმენტირების საშუალებას ჩინური და ტაილანდური სამზარეულო მაძლევს.

რაც შეეხება ევროპულ სამზარეულოს, საფრანგეთის სკოლა ჩემთვის მაინც პირველია კულინარიული ტექნიკის დახვეწის თვალსაზრისით. საქონლის ხორცი ბურგუნდიულად  ნამდვილი საოცრებაა და მერე რა, რომ მის მომზადებას თითქმის ორი დღე სჭირდება?! ასევე ვერ წარმომიდგენია ჩემი კვების რეჟიმი იტალიური პასტის, სალათებისა და ხმელთაშუაზღვის პროდუქტების გარეშე. არაფერს ვამბობ ქართულ სამზარეულოზე, რომელიც ჩემთვის მრავალფეროვნებისა და გემოთა შეხამების ეტალონია.

– ახალ გემოებს რამდენად თამამად სინჯავთ და თავად თუ გიყვართ ექსპერიმენტები?

მსოფლიოს 35-ზე მეტ ქვეყანაში ვარ ნამყოფი, ყოველთვის წინასწარ ვარჩევ ნაციონალური სამზარეულოს რესტორნებს და ვცდილობ შეფ-მზარეულებთან დამეგობრებას, რეცეპტებისა და, რაც მთავარია, კერძის მომზადების გამოცდილების გაზიარებას. ჩემი კულინარიისადმი სიყვარული ძალიან მეხმარება „კონსიერჟ თბილისის“ სტუმრების მოხიბვლაში, რადგან ზუსტად ვიცი რომელი ქვეყნის წარმომადგენელს რა გემოვნება აქვს. მუდმივად ვეცნობი ახალ ტენდენციებს კულინარიაში: როგორი ფორმით უნდა წარვადგინოთ კერძი, მასთან რომელი ღვინის შეხამებაა იდეალური, რამდენად მნიშვნელოვანია ჩვენი სტუმრებისათვის ე.წ. Farm to table კონცეფცია და, ზოგადად, ეკოლოგიურად სუფთა პროდუქტების დაგემოვნება.

– მიიჩნევთ თუ არა კულინარიას ხელოვნებად?

ჩემთვის კულინარია ჭეშმარიტი ხელოვნებაა. გემოების სწორად შეზავება, ექსპერიმენტები და დიდი შრომაა ჩადებული იმაში, რომ სტუმრებს შესთავაზო კერძი, რომელსაც შეგიქებენ და დაიმახსოვრებენ. ჩემთვის არ არსებობს დაწერილი რეცეპტები, დადგენილი ინგრედიენტები. სამზარეულოში ტრიალის ხიბლი სწორედ იმაშია, რომ არსებული პროდუქტებით შევქმნა რაიმე ახალი, აღმოვაჩინო ახალი კომბინაციები და სრულიად თავისუფალი ვიყო. ანალოგიური ფილოსოფიით ვარ „კონსიერჟშიც.“ შეფ-მზარეულთან ერთად, ყოველი ახალი დელეგაციისთვის ვწერ მენიუს, ერთად ვფიქრობთ რა მოეწონებათ სტუმრებს და ძალიან ხშირად ვანიჭებ უპირატესობას გათანამედროვებულ ქართულ სამზარეულოს. ზოგადად, უდიდეს პატივს ვცემ ყველა იმ ქართველ თუ უცხოელ შეფ-მზარეულს, ვინც ქართული სამზარეულოს სახეცვლილებას შეუწყო ხელი, წინა პლანზე წამოწია ჩვენი უნიკალურობა და, ამავე დროს, კერძებს თანამედროვე ელფერი მისცა.

 „კონსიერჟ თბილისი“ 2014 წელს დაარსდა და ის მომხმარებელს კომპლექსურ მომსახურებას სამი მიმართულებით სთავაზობს: ტურების ორგანიზება, ბიზნეს კონსიერჟი იგივე კონსიერჟ Lifestyle და ღონისძიებების ორგანიზება.

„კონსიერჟის ღონისძებები“ თავის თავში აერთიანებს მომსახურების სრულ სერვისს From Set Up to Clean Up. აქ კლიენტს დაუგეგმავენ ღონისძიებას, აჩვენებენ მაქსიმალურად მიახლოებულ ვიზუალებს, სტუმრების ტრანსპორტირებაზე, სასტუმროში განთავსებასა და სამახსოვრო საჩუქრებზეც იზრუნებენ, უცხოელი სტუმრებისათვის შეისყიდიან ავიაბილეთებს და მოუგვარებენ მას ვიზის საკითხს, დაუგეგმავენ სრულიად განსხვავებულ ექსკურსიას, რომელსაც ტურის დამკვეთი პირები, როგორც წესი, უნიკალურ გამოცდილებად აფასებენ ხოლმე.

ლიზი ხაბაზაშვილი, „კონსიერჟ თბილისის“ დამფუძნებელი

 „ჟურნალისტის პროფესია მნიშვნელოვნად დამეხმარა იმაში,რომ წლების განმავლობაში წარმატებით მემუშავა მარკეტინგის დარგში, შემდეგ ამას დაემატა სახელმწიფო მართვის მაგისტრის ხარისხი „ჯიპაში,“ და ბიზნეს ადმინისტრირების მაგისტრის ხარისხი- კვიპროსის უნივერსიტეტში. მრავალფეროვანმა განათლებამ და დაგროვილმა გამოცდილებამ ერთგვარად განაპირობა ჩემი სურვილი, დამეარსებინა საკუთარი კომპანია. კონსიერჟის პროფესია მნიშვნელოვნად არის დამოკიდებული ადამიანების საჭიროებების მოგვარებასთან. ჩემთვის საქმეში მთავარი- ადამიანების გაბედნიერებაა, „კონსიერჟ თბილისი“ ნამდვილად არის ის საქმე, რომელიც გადაჯაჭვულია ადამიანის ემოციებთან. 5 წლის გადმოსახედიდან 5000 დოლარის ინვესტიციით დაწყებული ბიზნესი მე თვითონაც არარეალურად მეჩვენება, თუმცა მიზანი იმდენად მკაფიოდ დავისახეთ, წარმატება გარდაუვალი აღმოჩნდა. ჩვენს საქმეში გადამწყვეტი ფაქტორია შესაბამისი უნარები და კარგი კონტაქტები.

• როგორი გემოები მოგწონთ? რას ამზადებთ თავად ყველაზე ხშირად?

სამზარეულოში ფუსფუსი ბავშვობიდან მიყვარდა. განსაკუთრებით კარგად ცომეული გამომდის. ნამცხვრები და ღვეზელები, შეიძლება ითქვას, რომ საფირმოა ჩემს რეცეპტებში, თუმცა დროის უქონლობის გამო ამას სისტემატიური სახე არ აქვს. საშობაო და სააღდგომო სუფრა კი უჩემოდ არასოდეს ეწყობა, განსაკუთრებით მიყვარს ზრუნვა ესთეტიკურ მხარეზე. „კონსიერჟის“ წვეულებებზეც ვიყენებ საკუთარ ხედვას და ჩემებურად ვპრანჭავ ხოლმე სტუმრების სუფრას.უპირატესობას იაპონურ სამზარეულოს ვანიჭებ. მიყვარს ზღვის პროდუქტებისგან დამზადებული კერძები. სადაც არ უნდა წავიდე, ყოველთვის ვცდილობ საუკეთესო რესტორანს ვეწვიო. ახალი ქვეყნების აღმოჩენა კერძების გემოებთან ასოცირდება და, შესაბამისად, დიდი ყურადღებით  ვარჩევ  რესტორანს. ყველაზე ხშირად გრილზე შემწვარ კრევეტებს  ვამზადებ ნივრის სოუზით.

• თავად თუ გიყვართ ექსპერიმენტები და ახალ გემოებს რამდენად თამამად სინჯავთ?

ზოგადად, ექსპერიმენტები მიყვარს და მარტივად შემიძლია ახალ გარემოსთან ადაპტირება, რაც ასევე ძალიან მეხმარება „კონსიერჟ თბილისის“ საქმიანობაში. ჩვენს საქმეში გარემო და მოვლენები იმდენად ხშირად იცვლება, რომ გამოწვევების მიმართ მოქნილობა, ვფიქრობ, წარმატების ერთ-ერთი საწინდარია. ახალი გემოები ხომ ახალი შთაბეჭდილებებია, შესაბამისად, არასდროს ვუშინდები ექსპერიმენტებს და თამამად ვაგემოვნებ შემოთავაზებულ კერძებს. განსაკუთრებით საინტერესოა ხოლმე შეფთან გასაუბრება და მისი რეკომენდაციების გათვალისწინება. მან ხომ ზუსტად იცის თავისი პროდუქტის განსაკუთრებულობა.

• რას მოიცავს თქვენი სამომავლო გეგმები? რა სიახლებს გეგმავთ კომპანიის განვითარების მიმართულებით?

ჩვენი ორწლიანი სტრატეგიის ნაწილია, გავზარდოთ პარტნიორების არეალი. ამჟამად სტრატეგიული პარტნიორები გვყავს არაბეთის გაერთიანებულ საემიროებსა და რუსეთში. მიზნად გვაქვს დასახული, პარტნიორები შევიძინოთ ჩინეთში, ყაზახეთში, ლატვიაში, ლიტვაში, აზერბაიჯანსა და ისრაელში.

 სამომავლო გეგმებში ჩვენი მომსახურებათა ჩამონათვლისთვის აპლიკაციის დამატება, რომელიც საშუალებას მოგვცემს სხვადსხვა სახის მომსახურება ინოვაციური ფორმით შევთავაზოთ საქართველოში ჩამოსულ ტურისტებს.

საქონლის ხორცი მონღოლურად

 ინგრედიენტები მარინადისათვის:

½ კგ საქონლის დარბილებული ხორცი

½ ჭიქა სიმინდის ფქვილი

4 სუფრის კოვზი მცენარეული ზეთი

2  კვერცხის ცილა

ნახევარი ჩაის კოვზი მარილი

სოუსი

1 სუფრის კოვზი დანაყილი ნიორი

½ ჩაის კოვზი წვრილად დაწრილი კოჭა ( ჯინჯერი)

4 სუფრის კოვზი სოიოს სოუსი

3 სუფრის კოვზი წყალი

2 ჩაის კოვზი ვაშლის ან ყურძნის ძმარი

½ ჩაის კოვზი ჩინური სუნელი (chinese five-spice powder)

¼ ჩაის კოვზი წითელი წიწაკა

1 ჩაის კოვზი ყავისფერი შაქარი

2 ჩაის კოვზი მცენარეული ზეთი

ბოსტნეული

2 დიდი თავი ხახვი

4 ბულგარული წიწაკა

ნახევარი კონა მწვანე ხახვი

მესამედი კონა ქინძი და 1 ჩაის კოვზი სეზამის მარცვლები კერძის მოსართავად

მომზადება:

თხელ ნაჭრებად დაჭრილ, წინასწარ დამარინადებულ ხორცს (მარინადი მინიმუმ 1 საათით უნდა გვედოს მაცივარში) ვათავსებთ ½ ჭიქა მაღალ ცეცხლზე გახურებულ მცენარეულ ზეთში და ვწვავთ იქამდე, სანამ ხორცი ოქროსფერ ელფერს არ მიიღებს და დარბილდება ( 10-15 წთ.)  ხორცს ვიღებთ თეფშზე და ვაცდით, რომ ზედმეტი ზეთი დაიწრიტოს.

პარალელურად საშუალოდ მაღალ ცეცხლზე ვთუშავთ დიდ ოთხკუთხედ ნაჭრებად დაჭრილ ხახვსა და ბულგარულ წიწაკას.

ხორცისა და ბოსტნეულის მომზადების პარალელურად ვამზადებთ სოუსს, რომელსაც ბოლოს შევურევთ  ჩვენ მიერ მომზადებულ ინგრედიენტებს. 2 ჩაის კოვზ მცენარეულ ზეთს ვაცხელებთ, ვუმატებთ ნიორსა და კოჭას, ვთუშავთ 2 წუთს, შემდებ ყველა თხევად ინგრედიენტს ვამატებთ და წამოვადუღებთ 2-3 წუთს შედარებით დაბალ ცეცხლზე.

ქვაბში ვათავსებთ ჩვენ მიერ შემწვარ ხორცს, მოთუშულ ბოსტნეულსა და მომზადებულ სოუსს. ამ ყველაფერს ერთად საშუალო ცეცხლზე 10-15 წუთის განმავლობაში ვაჩერებთ. დასასრულს  ვამატებთ მწვანე ხახვს, ხოლო მაგიდაზე მიტანამდე მოვაყრით წვრილად დაჭრილ ქინძსა და სეზამის მარცვლებს.

კერძის იდეალური გარნირია მოხარშული ბასმათის ბრინჯი.

ხმელთაშუაზღვის სალათი

ინგრედიენტები:

სალათის ფოთლების მიქსი ( რომანო, ლოლაბიონდო, ლოლა როსა და რუკოლა) 300 გრ

1 მოზრდილი ავოკადო

1 მსხალი

½ კგ. კრევეტი

2 კბილი ნიორი

1/5 ჩაის კოვზი წითელი წიწაკა

50 გრ. კარაქი

ინგრედიენტები დრესინგისთვის:

50-80 გრ. ზეითუნის ზეთი

1 ჩაის კოვზი გარგრის ან ატმის ჯემი

1/4 ჩაის კოვზი დანაყილი ნიორი

¼ ჩაის კოვზი ბალზამიკის ძმარი

მომზადების წესი:

კარგად გარეცხილ და გასუფავებულ კრევეტს ვთუშავთ ნიორთან და კარაქთან ერთად, ვუმატებთ მარილს, წითელ წიწაკასა და ლიმნის წვენს გემოვნებით.

პარალელურად ტაფაზე ვადნობთ კარაქს და ვიწყებთ თხლად დაჭრილი მსხლის კარამელიზებას, მსხალი იქამდე უნდა შევწვათ, სანამ სასიამოვნო ოქროს ფერ ელფერს არ შეიძენს.

ზეითუნის ზეტს ვუმატებთ დანაყილ ნიორს, გარგრის ჯემს და ბალზამიკის ძმარს, კარგად ვურევთ, რომ ერთგვაროვანი დრესინგი მივიღოთ.

სალათის ფურცლებს საგულდაგულოდ ვრეცხავთ და ვაშრობთ, ფურცლების მიქსს ვუმატებთ გრძელ ნაჭრებად დაჭრილ ავოკადოს, ჩვენ მიერ მომზადებულ კრევეტსა და სპეციალურ დრესინგს, კარგად ვურევთ. სტუმრებისათვის მირთმევის წინ სალათს ზემოდან ვალაგებთ კრევეტებსა და კარამელიზებულ მსხლის ნაჭრებს.