Christmas & New Year’s Dinner

DSC_6813

10_Issue_CulinArt23

საშობაო საღამოსთვის აქ ყველაფერია – ზამთრის პეიზაჟიც, სადღესასწაულო გარემოც და მადისაღმძვრელი კერძებით გაწყობილი სუფრაც. ცნობილმა ქართველმა კულინარებმა საზეიმო კერძებისა და „კულინArt“- ის მკითხველების საშობაო განწყობის შექმნაზე ერთდროულად იზრუნეს.
აქეთ – გამომცხვარი ბატი იწონებს თავს ვაშლებსა და კომშებში, იქით – მარიანას კამამბერი ნაწილდება თეფშზე მილიმეტრის სიზუსტით. მერე თეკუნას ლაბასხმულაზე ჩამოვარდება სიტყვა, სხვები ქეთი ბაქრაძის კარამელიზებულ ხახვს ურთულესი, პრაქტიკულად ჩინური ეპითეტებით განიხილავენ. ვდგავარ და ვუსმენ… დიდი უცნაური ხალხია ეს კულინარები!
გადაღების დასრულების შემდეგ კი მხოლოდ ერთი რამ მიტრიალებს თავში – ალბათ როგორი მოსაწყენი იქნებოდა დღესაწაულებიც და, ზოგადად, ცხოვრებაც, ყველაფერი რომ ყოველთვის ისე იყოს, როგორც დღეს
არის; როგორც გუშინ იყო… რომ არ ვიცვლებოდეთ!

და მოულოდნელად მიხარია იმის აღმოჩენა, რომ უკვე ბევრი რამ შეიცვალა ამ პატარა ქალაქში; შეიცვალა იმიტომ, რომ ვიღაც-ვიღაცებმა მარტივად აუწყვეს ფეხი 21-ე საუკუნის გამოწვევებს… და ეს „ვიღაცები“ ახლა „კულინArt“-სთვის ისეთივე მონდომებით პოზირებენ, როგორც რამდენიმე საათის წინ თავ-თავიანთ სამზარელოში ჯადოქრობდნენ.
და, აი, ისიც – შობა-ახალი წლისა და კრეატიულობის დღესასწაული! – ქეთი ბაქრაძის გრავლაქსი და შებოლილი იხვი; თეკუნას ლაბასხმულა; მარიანას გამომცხვარი კამამბერი; მერიკოს მონღოლური სტეიკი; გიორგი იოსავას ბატი კომშით; ქეთი სალაყაიას გოგრის დესერტი; რამაზის საახალწლო ტორტი – ბევრისთვის უცნობი კერძები კარგად ნაცნობი შვიდი პროფესიონალის ინდივიდუალური, განუმეორებელი ხელწერით…
აგემოვნებ კი არა, უფრო ცასა და დედამიწას შორის ლივლივებ, მერე კი დაუოკებელი სურვილი გიჩნდება – შენს სამზარეულოს მიაშურო და რამდენადაც შეძლებ მიბაძო…
…პრაქტიკულად გოგრაში ვზივარ – კონკიას სატრანსპორტო საშუალებას არ ვგულისხმობ – ქეთი სალაყაიას მეგობრული გამოწვევის საპასუხოდ – იცი, რა ადვილიაო? ფენა-ფენა მანიაკური პედანტურობით ვალაგებ ქიშმიშს, კურაგას, ნიგოზს, თხილს და მთელი გულით ვნატრობ ისეთი მაგარი გამოვიდეს, ისეთი, ისეთი, რომ!..
კიდევ იმასაც ვფიქრობ – ოღონდ ზოგჯერ – ხომ შეიძლება შობაც და ახალი წელიც ნაძვის ხის, მორთული ფანჯრების, გენერალურად დასუფთავებული სახლის, ახალი კაბის, „საწვალებელი“ კერძებისა და ჭერამდე აკოკოლავებული გასარეცხი ჭურჭლის გარეშე მოდიოდეს?
ღირს ამდენ შრომად, ამდენ ემოციად და ეიფორიად წუთები, რომლებიც მირაჟულად ხანმოკლეა ყოველ წელს? …და მერე მახსენდება, რომ ზუსტად ამიტომ… ზუსტად ამიტომ, რომ წელიწადში ერთხელ, მხოლოდ ერთ
დღეს, მხოლოდ ერთ საღამოს ბრუნდება სასწაულის მოლოდინისა და სიხარულის ყოვლისმომცველი განცდა, თვალების დახუჭვის, სურვილის ჩაფიქრების წამი და შეგრძნება, რომ ვდღესასწაულობთ…
ღირს, ნამდვილად ღირს!

10_Issue_CulinArt24

თეკუნა გაჩეჩილაძე
"კულინარიუმის" დამფუძნებელი

„საახალწლო სუფრისთვის გოჭის ლაბასხმულა მოგიმზადეთ – ტრადიციული „ხოლოდეცის“ ვარიაცია, მისი უფრო თანამედროვე ვარიანტი, რომელიც პორციებადაა გამზადებული და ესთეტიკური თვალსაზრისით გაცილებით მიმზიდველად გამოიყურება. პატარა კუბების ფორმა აქვს და უფრო მსუბუქია, ვიდრე „ხოლოდეცი.“ წვენი, რომლისგანაც მზადდება, ძალიან არომატულია – ჯანჯაფილით, მდოგვითა და ბევრი სუნელით შეზავებული. ცხიმი მთლიანად მოხდილი აქვს. აუცილებლად მოგეწონებათ და იოლადაც შეძლებთ მის მომზადებას. იქიდან გამომდინარე, რომ საქართველოში დიდხანს არ ვცხოვრობდი, ჩემთვის ახალი წელი ბოლო 20 წელია ოჯახურ სუფრასთან ასოცირებული არაა, წვეულებასა და მხიარულებას ნიშნავს. ამიტომ ვცდილობ გავერთო და კარგი დრო გავატარო. ვგიჟდები ახალ წელზე, ჩემი ერთ-ერთი უსაყვარლესი დღესასწაულია!“

10_Issue_CulinArt25

გოჭის ლაბასხმულა
გოჭს ვხარშავთ, წვრილად ვჭრით. ნახარშს დაფნის 2 ფოთოლს, 5-6 ცალ ბახარს, 100 გრ. ჯანჯაფილს, 200 გრ. ძმარს, 3-4 ნიორს, 2-3 ხახვს, 2-3 ფორთოხალს, 50 გრ. დიჟონის მდოგვს და 50 გრ. პირშუშხას ვამატებთ. 2 ლ. წყალზე ჟელატინის 10 ფირფიტა გვჭირდება. ვადუღებთ, გამზადებული ნახარშში გადაგვაქვს, დაბალ ცეცხლზე კიდევ ერთხელ წამოვადუღებთ და სასურველ ფორმებში გადავიტანთ.

10_Issue_CulinArt26

ქეთი ბაქრაძე
რესტორატორი, “The Dining Room“-ის მეპატრონე

”ჩემი უსაყვარლესი დღესაწაულისთვის ორი კერძი მოვამზადე: ერთი ცივია – დამარინადებული ორაგულის გრავლაქსი და მეორე- ფენოვან ცომში გამომცხვარი საქონლის სუკის ნაჭერი შებოლილი იხვითა და სამი სახეობის სოკოთი. მას თავისი სოუსი აქვს – კარამელიზებული ხახვი კონიაკსა და პორტოს ტიპის ღვინოში. ორივე კერძი ჩვენთვის არატრადიციულია, თუმცა ნებისმიერი, ვინც დაინტერესდება, თავისუფლად შეძლებს მათ მომზადებას. საერთოდ, დღესასწაულებსა და გართობაზე ვგიჟდები, შობა და ახალი წელი კი განსაკუთრებით ამაღლებულ განწყობაზე მაყენებს. მიყვარს ახალი წლის მთაში, თოვლში ბევრ მეგობართან ერთად შეხვედრა. უამრავი პროდუქტი მიმაქვს და ვამზადებ ყველაფერს, რაც მომეხასიათება.”

10_Issue_CulinArt27

ორაგულის გრავლაქსი
ავიღოთ 500 გრ. ორაგულის ფილე, მოვათავსოთ კონტეინერში მოვაყაროთ 8 სუფრის კოვზი ყავისფერი შაქარი, 9 სუფრის კოვზი მარილი, დაჭრილი ერთი კონა კამა, ორი ლიმონის ცედრა და 25 გრ. არაყი. კარგად გადავუსვათ ეს ყველაფერი ორაგულს. შემდეგ კონტეინერს, რომელშიც თევზია მოთავსებული, მჭიდროდ შემოვაკრათ პლასტიკი, დავადოთ სიმძიმე და 5-6 საათით შევდოთ მაცივარში. შემდეგ ამოვიღოთ, გავწმინდოთ, დავჭრათ თხელ ნაჭრებად.

10_Issue_CulinArt28

ფენოვან ცომში გამომცხვარი საქონლის სუკი შებოლი იხვითა და სოკოთი
ავიღოთ საქონლის სუკი და ცხელ ტაფაზე ყველა მხრიდან კარგად მოვბრაწოთ. გავშალოთ პლასტიკი
და შებოლილი თხლად დაჭრილი იხვი დავაწყოთ. მოვთუშოთ სოკოები და დავაბლენდეროთ. მიღებული
მასა პლასტიკზე მოთავსებულ შებოლილ იხვს წავუსვათ, ზემოდან საქონლის სუკი დავადოთ, შევკრათ და 30
წუთით მოვათავსოთ მაცივარში. ამასობაში ჩავრთოთ ღუმელი, ოდნავ გავაბრტყელოთ ფენოვანი ცომი, მოვხსნათ პლასტიკი შებოლილ იხვში გახვეულ საქონლის სუკს და ფენოვან ცომში მოვათავსოთ. კარგად შევკრათ, ზემოდან კვერცხის გული გადავუსვათ და 35 წუთით შევდოთ ღუმელში.

10_Issue_CulinArt29

ქეთი სალაყაია
„ლე მარე“-სა და „ლე პონჩიკი“-ის დამფუძნებელი

„საშობაო სუფრისთვის გოგრის დესერტი შევარჩიე, რომელსაც ბებია ამზადებდა, მაგრამ მე რაღაცები დავუმატე. მთლიან გოგრაში ბრინჯს ვათავსებ, რომელსაც ქიშმიში, ნუში, გარგარის ჩირი, თხილი, ნიგოზი, შაქარი, კარაქი, ვანილი, ფორთოხლის ცედრა, ლიმონისა და ფორთოხლის ფრეში აქვს დამატებული. ზოგადად, ტკბილეულის მოყვარული არ ვარ, მაგრამ ესაა ერთ-ერთი დესერტი, რომელსაც სიამოვნებით მივირთმევ. გარდა იმისა, რომ უგემრიელესია, სუფრაზე ვიზუალურადაც ძალიან მომგებიანია. რამდენჯერაც მოვამზადე, აღფრთოვანებას იმსახურებს ხოლმე. თან არც ძვირი ჯდება, საშუალო ზომის გოგრა სჭირდება და 200- 200 გრამი ყველაფერი, რაც ბრინჯს უნდა დავამატოთ. შობის დღესასწაულს ყოველთვის სახლში ვხვდები, ოჯახის წევრებთან ერთად. ვცდილობ ხოლმე სუფრაზე ის იდოს, რაც მათ ამაღლებულ, სადღესასაწაულო განწყობას შეუქმნის.“

10_Issue_CulinArt30

გოგრის დესერტი
საშუალო ზომის გოგრას თავს ამოვაჭრით, ამოვასუფთავებთ და ორთქლზე მოვხარშავთ.
200 გრამ ნუშს მდუღარე წყალს ვასხამთ და 15 წუთს ვაჩერებთ, რომ კანი იოლად მოვაცილოთ. თხილს
ოდნავ ვხალავთ 110 გრადუსზე.
სქელძირიან ტაფას ვდგამთ გამანაწილებელზე, ვადნობთ 500 გრ. კარაქს, 200 გრ. შაქარს და ვალღობთ ერთგვაროვანი მასის მიღებამდე. ვამატებთ 200-200 გრ. თანაბრად დაჭრილ ნუშს, ნიგოზს, კურაგას, ქიშმიშს.
გაგრილებულს ვამატებთ ნახევარი ლიმონის ფრეშს.
ერთ ჭიქა (200 გრ.) გრძელ ბრინჯს ვხარშავთ მარილიან წყალში ისე, რომ ოდნავ მაგარი დარჩეს. გოგრაში ძირზე ერთ ლებან ფორთოხალს ვდებთ და ფენა- ფენა ვათავსებთ ბრინჯსა და გამზადებულ ნარევს. ვაყრით ფორთოხლის ცედრას, ყველა ფენას შორის ვამატებთ 1 კოვზ შაქარს და ოდნავ მარილს. ტაფაში ვადნობთ 50 გრ. კარაქს, ჩავაწურავთ ერთ ფორთოხლის ფრეშს, ნახევარ ლიმონის ფრეშს და ვამატებთ 50 გრამ შაქარს.
გოგრა რომ ამოივსება, ამ ნარევს მოვახსამთ და ზემოდან ერთ ლებან ფორთოხალს ვადებთ. გოგრის ამოჭრილ ნაჭერს დავახურავთ, დაბალ ცეცხლზე შევდგამთ ღუმელში და სტუმრებთან გატანამდე ნახევარი საათით ადრე 160 გრადუსზე გამოვაცხობთ, სანამ გარედან ოდნავ არ გამუქდება.

10_Issue_CulinArt31

გიორგი იოსავა
რესტორატორი, “Burger House”-ის დამფუძნებელი

„ბოლო წლებია შობის დღესასწაულს სამსახურში ვატარებ, ამიტომ ძირითადად იმაზე ვარ ორიენტირებული, ჩემს სტუმრებს შევუქმნა საზეიმო განწყობა. მაქვს რამდენიმე კერძი, რომელიც განსაკუთრებული მოწონებით სარგებლობს. მათ შორისაა გამომცხვარი ბატი ვაშლითა და კომშით. ხილს მარტო გასაფორმებლად კი არ ვიყენებ, ბატი შიგნიდანაც ვაშლისა და კომშის ნაჭრებითაა ამოვსებული. ყველას ძალიან მოსწონს! ეს ტრადიციული საშობაო კერძია, სადღესასწაულო სუფრაზე მას მთავარი ადგილი შეგიძლიათ მიუჩინოთ.“ 

10_Issue_CulinArt32

გამომცხვარი ბატი კომშითა და ვაშლით

 2 კილოგრამიან ბატს გავასუფთავებთ, წავუსვამთ მარილს, სუნელებს, ამოვავსებთ საშუალო ზომის ნაჭრებად დაჭრილი ვაშლითა და კომშით, ამოვკერავთ და 2 საათის განმავლობაში გამოვაცხობთ ღუმელში 160 გრადუსზე. ქვემოდან თუნუქის ფურცელს დავუდებთ, რომ ზედმეტი ცხიმი ჩამოიწუროს. 2 საათის მერე ტემპერატურას 200 გრადუსამდე ვუმატებთ, ბატს გარშემო ვაშლისა და კომშის ნაჭრებს შემოვუწყობთ, რომლებსაც ზემოდან შაქარსა და დარიჩინს მოვაყრით. ამ ყველაფერს 15-20 წუთით დავტოვებთ ღუმელში, რომ კარგად დაიბრაწოს. 400 გრ. წითელ მშრალ ღვინოს ქვაბში ვადუღებთ, ვუმატებთ 150 გრ. შტოშის ჩირს და შესქელებამდე ვტოვებთ ქურაზე. შეგვიძლია გაყინული კარაქის რამდენიმე პატარა კუბი დავუმატოთ. გამზადებულ სოუსს ბატს მოვასხამთ ან ცალკე მივიტანთ სუფრაზე.

10_Issue_CulinArt33

მერიკო გუბელაძე
„შავი ლომი“-ის, „ლისი“-ის და „ლეილა“-ს შეფ-მზარეული
„სტეიკი მონღოლურად – ეს შევარჩიე შობის სადღესასწაულო საღამოსთვის. უგემრიელესი კერძია, რომელიც პირველად წლების წინ ნიუ-იორკის ერთ-ერთ ჩინურ რესტორანში გავსინჯე. სუკის სტეიკი ჯანჯაფილისა და სოიოს სოუსით მზადდება, ძალიან საინტერესო გამოდის! მე კლასიკურად ვამზადებ, როგორც რეცეპტშია, ისე. განსაკუთრებით იმ დიასახლისებს  მოეწონებათ, ვისაც უნდა სადღესასწაულო კერძი ისე მოამზადოს, რომ მთელი დღის სამზარეულოში გატარება არ მოუხდეს. სწრაფი და მარტივი რეცეპტია და ამავე დროს უგემრიელესი! წლების განმავლობაში ამერიკაში ვცხოვრობდი, იქაც ოჯახურ გარემოში აღვნიშნავდი შობას და ახლაც ასეა. სადღესასწაულო სუფრისთვის ძირითადად იმას ვამზადებ, რაც ჩემს შვილს და ოჯახის დანარჩენ წევრებს უყვართ. მათ შორისაა ეს კერძიც.“

10_Issue_CulinArt34

სტეიკი მონღოლურად
ავიღოთ გასუფთავებული 500 გრ. საქონლის სუკი, დავჭრათ მოგრძო, თხელ ნაჭრებად, ამოვავლოთ სიმინდის სახამებელში და 10 წუთს გავაჩეროთ. პარალელურად გავახუროთ ტაფა, დავასხათ 500 მლ. ზეთი და ავადუღოთ. ჩავყაროთ ხორცი და შევწვათ 4-5 წუთს. გადმოვიღოთ და გავაშროთ ქაღალდზე. ცალკე მოვამზადოთ სოუსი: გავახუროთ ტაფა, მოვასხათ 1 ს/კ სიმინდის ზეთი, დავყაროთ წვრილად დაჭრილი 2 კბილი ნიორი და ერთი ჩაის კოვზი წვრილად დაჭრილი კოჭა, 2 წუთს ვურიოთ. დავასხათ 150 მლ. სოიოს სოუსი, 150 მლ. წყალი, დავყროთ 50 გრ. შაქარი და ვადუღოთ ნელ ცეცხლზე 5-7 წუთს. სოუსში ჩავალაგოთ შემწვარი ხორცი, მოვაყაროთ წვრილად დაჭრილი 6-7 ღერი მწვანე ხახვი და ვადუღოთ ნელ ცეცხლზე 5-7 წუთს. მივირთვათ ბრინჯითა და ბოსტნეულით.

10_Issue_CulinArt35

მარიანა ჭყონია
რესტორატორი, “Mukhatsakatukha”-ს მეპატრონე
„შობის ვახშმისთვის ფრანგული კერძი შევარჩიე. ესაა გამომცხვარი კამამბერი ლურჯი ყველით, მსხლითა და სპეციებით. ძალიან მარტივი მოსამზადებელი და ამავე დროს უგემრიელესია! პირველად წლების წინ საფრანგეთში დავაგემოვნე, თუმცა მოგვიანებით მსხალი და რამდენიმე არომატი თვითონ დავუმატე. ეს კერძი ყოველთვის ხვდება ჩემს სადღესასწაულო სუფრაზე, წელსაც აუცილებლად მოვამზადებ. სხვათა შორის, მეოთხე წელია შობას კახეთში, ჩემს სოფელში ვხვდები. ჩემთან ერთად მეგობრებიც მოდიან, იქაურ მეზობლებს ვეძახით. შობის აღსანიშნავად ვამზადებთ სხვადასხვა კერძს; მეზობლებსაც, ვისაც რა აქვს, გადმოაქვს და დიდ მხიარულებაში ვართ!“

10_Issue_CulinArt36

გამომცხვარი კამამბერი
20 გრ. ლურჯი ყველი, 20 გრ. წვრილად დაჭრილი მსხალი, 10 გრ. თაფლი, 20-30 გრ. გრამი დარიჩინი და ცოტა როზმარინი ავურიოთ ერთმანეთში. კამამბერს შუაგული ამოვაჭრათ და წინასწარ მომზადებული ნარევი შიგნით მოვათავსოთ. გამოვაცხოთ ღუმელში 200 გრადუსზე 15 წუთის განმავლობაში.

10_Issue_CulinArt37

რამაზ გემიაშვილი
კაფე „ციტრონი“-ს მეპატრონე
„საახალწლო ტორტი – ესაა ქართული ტრადიციული გემოს დესერტი. ბევრი ფენა და ინგრედიენტი აქვს: შინაური, სახლში დამზადებული ხაჭო, გოზინაყი, ბეზე, მასკარპონეზე დამზადებული კრემი, რომელიც ტრადიციულ მოხარშულ კრემს ჰგავს, ფხვიერი ცომის ფენა, ჩვეულებრივი ბისკვიტი, მოხალული ნიგოზი და ასევე მოხალული არომატული თხილი. ეს ტორტი პირველად შარშან გამოვაცხვე. ვერ მოვიტყუები, რომ იოლი მოსამზადებელია. მაქსიმალურად ვცდილობ ძველი გემოები შევინარჩუნო, ამას არ გავურბივარ, პირიქით! რაც მთავარია, ეს ფაქტურები – კრემი, ბეზე, ბისკვიტი, ფხვიერი ცომი, თხილეული – ერთმანეთში ისე უნდა გადადიოდეს, რომ გემოს აღქმა არ გაჭირდეს. თუ ფაქტურათა ბალანსი დარღვეულია, გემოს აღქმა დანაწევრებულად ხდება და მთლიანობა იკარგება. ახალი წელი დღემდე ძველი, ბავშვობიდან გამოყოლილი განწყობის გამო მიყვარს. ყოველთვის სახლში ვხვდები ხოლმე, ოჯახთან ერთად, მერე მეგობრები მოდიან ჩემთან კაფეში და იქ ვაგრძელებთ აღნიშვნას.“

DSC_6909

საახალწლო ტორტი
ბისკვიტის მოსამზადებლად 100 გრ. კარაქსა და 100 გრამ შაქრის ფხვნილს ვურევთ ერთმანეთში, ვამატებთ ნახევარი ლიმონის ცედრას, ვანილს, მარილს და ფქვილს იმდენს, რომ ნაზი ცომი მივიღოთ. მიღებულ ნარევს 1 საათს ვაციებთ მაცივარში, ვაბრტყელებთ სასურველ ფორმაზე და 10 წუთს ვაცხობთ 200 გრადუსზე.
ბისკვიტი ფხვიერი გამოდის, ფიცარზე გადაგვაქვს და ფორმის შესანარჩუნებლად გაგრილებისთანავე საყინულეში ვდებთ. ვაცხობთ პატარ-პატარა 70 ცალ ბეზეს. გახეხილ 300 გრ. ხაჭოს გემოვნებით ვამატებთ შაქრის ფხვნილსა და ვანილს.
300 გრ. ნაღებსა და 200 გრ. რძეს ერთმანეთში შევურევთ, ვამატებთ 10 კვერცხის გულს, 250 გრ. შაქარს და ნელ ცეცხლზე ვდგამთ. მუდმივად ვურევთ, წამოდუღებისთანავე გადმოვდგამთ ქურიდან და ვაგრილებთ. სანამ გაცივდება, 200 გრამ კარაქს კარგად ავფთქვიფავთ და კრემს შევურევთ.
ცალკე ვამზადებთ გოზინაყს: 2-2 სუფრის კოვზ თაფლსა და შაქარს ერთმანეთში შევურევთ და 150 გრ. დაჭრილ ნიგოზთან ერთად წამოვადუღებთ. დავამატებთ 2 სუფრის კოვზ ალუბლის კომპოტს, გადავიტანთ კალკაზე და ბისკვიტის ფორმას მივცემთ.
200 გრ. თხილს მოვხალავთ, კანს გავაცლით, დავყრით ტაფაზე, დავაყრით 2 სუფრის კოვზ შაქარს, წამოვადუღებთ, სანამ მოწითალო ფერს მიიღებს. გადავიტანთ სველ ფიცარზე, გავაციებთ და დავაბლენდერებთ.
ვიწყებთ ტორტის აწყობას: ბისვიტს ვუსვამთ კრემს, ვადებთ გოზინაყს, შემდეგ ისევ კრემს, მთლიანად ვფარავთ ბეზეებით, ისევ ვუსვამთ კრემს, ვალაგებთ ბეზეების მეორე ფენას, ისევ კრემი, ხაჭოს მასა და ზემოდან კვლავ კრემი. ტორტს კარგად ვაციებთ საყინულეში და უკვე გამზადებულს ზემოდან დაბლენდერებულ თხილს ვაყრით. თუ გაფორმებასაც მოვისურვებთ, ცივი კრემი დაგვჭირდება, რომელსაც შესქელებული რძისა და კარაქის შერევით ვამზადებთ.
… ქიშმიში სწორედ ისე ამაყად დაიბერა ტაფაზე, ქეთი რომ მიხსნიდა, – აი, დაიბერება და ესე იგი, მზადააო. ბრინჯიც ფანტია მოიხარშა – ფიფქებივით… ვალაგებ და ვალაგებ ფენებად ნიგვზებს და კურაგებს და ჩემთვის ვბუტბუტებ: ხელოვნებაა, აბა რა არის მართლა?! და მიხარია, რომ ველოდები ახალ წელს, ველოდები ნამდვილ ფანტია ფიფქებს, ველოდები ოჯახის წევრების რეაქციას, როცა ჩემთვის ასე საამაყო კულინარიული მასტერკლასის შედეგს დააგემოვნებენ და მიხვდებიან, სად გადავიკარგე მთელი 7 საათით… ლაბასხმულების, სტეიკების, გრავლაქსების, დესერტების, სურვილების ჩაფიქრების ღამე მოდის და აბა ამასთან გასარეცხი ჭურჭლის მთები რა მოსატანია?!

ფოტო: ირა კურმაევა, ანა ბოკო

No Comments Yet

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

"კულინART"
კულინარია, როგორც ხელოვნება.

contact@redakcia3.com