მარიკა გოგოლაშვილი / მწვრთნელი, სტუდიო 7

ჩვენი მოვარჯიშეები ხშირად გვეკითხებიან უნდა ვჭამოთ თუ არა ვარჯიშის წინ და ვარჯიშის შემდეგ.
რა თქმა არ არსებობს უნივერსალური პასუხი და არც 1 გამორჩეული ფორმულა რომელიც აბსოლუტურად ყველას მოერგება.
აქ გასათვალისწინებელი უამრავი ფაქტორია- ასაკი, ცხოვრების წესი, ნივთიერებათა ცვლა, ენდოკრინული სისტემა, გენეტიკა, სხეულის წყობა და ფორმები და თავად ქალბატონის ინდივიდუალური მოთხოვნა- ვიღაცას უნდა გახდომა, ვიღაცას შენარჩუნება, ვიღაცას გამკვრივება და ა.შ.
პირველ რიგში რასაც ვეუბნები ყველა მოვარჯიშეს არის ის, რომ არავითარ შემთხვევაში არ იშიმშილონ. უკვე ყველამ იცის, რომ შიმშილით დაკლებულ წონას, ორმაგად თუ არა ერთმაგად მაინც, უკან დაიბრუნებენ როგორც კი შიმშილიდან ნორმალურ კვებაზე გადავლენ. მეორე, ინტენსიური ვარჯიშის და ფიზიკური დატვირთვის დროს (კვირაში 3-4 ჯერ კარდიო თუ პილატესი) აუცილებელია სწორი კვება. კუნთი რომელიც ინტენსიურად იტვირთება აუცილებლად უნდა აღდგეს. თუ ვარჯიშთან ერთად არასწორ ან არასაკმარის საკვებს იღებთ, კუნთი გამოიფიტება, სხეული გადაიღლება, ორგანიზმს ნებისმიერი დატვირთვის წინააღმდეგ იმუნიტეტი გამოუმუშავდება, ნივთიერებათა ცვლა შენელდება და სასურველი შედეგის ნაცვლად აბსოლუტურად საპირისპიროს მივიღებთ. საბედნიეროდ დღეს ხელმისაწვდომია უამრავი მასალა, რომელიც კომპეტენტურ წყაროებზე და კვლევებზე დაყრდნობით, გვირჩევს როგორ ვიკვებოთ ამა თუ იმ დატვირთვის დროს. პირადად მე ვთვლი, რომ პროტეინები, ცილები – მაგალითად ხორცი; თევზი; კვერცხი; უცხიმო ყველი, კეფირი საუკეთესო პროდუქტებია ვარჯიშის შემდეგ მისაღებად.განსაკუთრებით თუ საღამოს ვარჯიშობთ. ახლა თბილისში ნელ ნელა პოპულარული ხდება ჰუმუსი. ეს არის პროტეინებით, ნახშირწყლებით და არა ცხოველური ცხიმით მდიდარი კერძი, რომელიც იდეალურია ნებისმიერი ჯანსაღი კვების ადეპტისთვის, ვინაიდან ძალიან დაბალკალორიულია და ამავდროულად კარგადაც ანაყრებს. რა თქმა უნდა თუ მასთან ერთად პიტა პურის ნაცვლად სტაფილოს ან კიტრს მივირთმევთ. ვარჯიშამდე შეგიძლიათ ასევე ვაშლი, ნუში ან ბანანი მიირთვათ.

დილით თუ ვარჯიშობთ, არასოდეს არ ივარჯიშოთ მშიერმა. ერთი საათით ადრე მაინც მიირთვით წყალზე დამზადებული შვრიის ფაფა, მარილის და შაქრის გარეშე, რომელსაც შეგიძლიათ ხილი, ნუში, ნიგოზი, ქიშმიში ან 1 კოვზი თაფლი დაამატოთ; ასევე კარგია მაწონი, ვაშლით, ატმით ან ისევ თხილეულით და თაფლით. ამგვარი ტიპის საუზმე შეიძლება დაბალკალორიული არ არის, მაგრამ სამაგიეროდ ჯანსაღია, დაგანაყრებთ და ვარჯიშისთვის აუცილებელ ენერგიას მოგცემთ.ვარჯიშამდე ერთი საათით ადრე წახემსება და ვარჯიშიდან 15-30 წუთის შემდეგ ჭამა აუცილებელიც კი არის.
წყალზეც ბევრი იწერება, ბევრი საუბრობს. გავიმეორებ მეც – წყალი, წყალი და წყალი! დღეში 1.5.- 2 ლიტრი. მათ შორის და განსაკუთრებით ვარჯიშის დროს!
ყველაზე ძალიან ის მიხარია, რომ მოვარჯიშე გოგოების რიცხვი წლიდან წლამდე იზრდება! ეს ყველა მიმართულებით ასეა, ჩემთან პილატესზე, ტაე ბოზე თუ აერობიკაზე.
ამაზე დიდი მოტივაცია და საჩუქარი, მწვრთნელისთვის არაფერია. მეც მუდმივად ვმუშაობ ჩემს თავზე, ვადგენ ახალ პროგრამებს, ვეძებ ახალ მასალას.. ვარჯიშზე მოსულს ინტერესი, სურვილი და მოტივაცია უნდა შეუნარჩუნო, არ უნდა მოაბეზრო; ხოლო საკუთარ სხეულზე პირველ შედეგს რომ დაინახავენ, მერე უკვე თვითონ უჩნდებათ სურვილი მეტი და მეტი გაუკეთონ საკუთარ თავს! ჩემმა ერთგულმა მოვარჯიშეებმა იციან – ერთადერთი რასაც "ვკრძალავ" არის ფუნთუშები, თეთრი პური, პიცა და ხაჭაპური. მესმის რომ გემრიელია, მაგრამ ჩვენ, ამ სფეროში მომუშავე ადამიანები, შეჩვეულები ვართ ამგვარ კერძებზე უარის თქმას და ამ მხრივ ნებისყოფა გამომუშავებული გვაქვს, ამიტომ გულწრფელად ვერ ვხვდები ხოლმე როდესაც მეუბნებიან, რომ პურზე უარს ვერ ამბობენ. რა თქმა უნდა ისიც მესმის, რომ ხანდახან საკუთარი თავი აუცილბლად უნდა გავანებივროთ იმ კერძებით რომლებიც ყველაზე ძალიან გვიყვარს! მაგრამ იშვიათად.
საერთოდ ვთვლი რომ მთავარია ზომიერება, საკუთარი თავის და ორგანიზმის უკეთ გაცნობა, საკუთარი თავის პატივისცემა და სიყვარულია! ზედმეტი არც ვარჯიშია კარგი და არც ჭამა!